Издавачката куќа „Прозарт медиа“ и Tурскиот културен центар „Јунус Емре“ ве покануваат на промоција на романот „Лалето на Истанбул“.
Овој четврток (15.12.2016), со почеток во 19.30 часот, во хотелот „Буши“ во Старата скопска чаршија, а во рамките на промоцијата на романот „Лалето на Истанбул“, ексклузивно ќе гостува турскиот писател, колумнист и професор Искендер Пала, еден од најистакнатите турски писатели на денешницата. Познат е како „човекот што прави да се засака диван поезијата“. Од граѓаните на неговиот роден град е избран за „Народен херој на Ушак“. Неговиот роман „Смрт во Вавилон, љубов во Истанбул“ е продаден во тираж од стотина илјади примероци и е многупати награден. Турскиот завод за патенти го регистрира Искендер Пала како име на бренд. Во 2013 година ја добива Големата претседателска награда за култура и уметност во полето на литературата.
Авторот ќе потпишува примероци од книгата на турски и на македонски јазик.
Промотори се академик Луан Старова и проф. д-р Александар Прокопиев.
„Лалето на Истанбул“ од турски на македонски јазик ја преведе Анета Матовска.
